Muqdisho, (Dawan )- In ka badan 20 dowladood iyo urur caalami ah ayaa ugu baaqay Israa’iil inay ka laabato aqoonsiga ay siisay Somaliland, taas oo ay dowladda Federaalka Soomaaliya ku tilmaantay xadgudub cad oo ka dhan ah midnimada, madax-bannaanida iyo dhuleednimada dalka.
Bayaankan, waxaa soo saaray wasiirrada arrimaha dibadda ee dalalka Masar, Aljeeriya, Bangladesh, Jasiirada Comoros, Jabuuti, Gambia, Indonesia, Iiraan, Urdun, Kuwait, Libya, Maldives, Nigeria, Oman, Pakistan, Falastiin, Qatar, Sacuudiga, Soomaaliya, Sudan, Turkiga, Yemen, iyo sidoo kale Ururka Iskaashiga Islaamiga (OIC).
Wasiirradu waxay xuseen in booqashada mas'uul ka tirsan Israa’iil ee Somaliland 6-da Janaayo 2026 ay tahay mid sharci darro ah, waxayna ku tilmaameen in talaabadan ay si toos ah u jabineyso siyaasadda caalamiga ah, sharciga, iyo mabaadi’da Qaramada Midoobay, isla markaana khatar gelinaysa amniga gobolka.
Bayaanka ayaa sidoo kale lagu adkeeyay in taageeridda qorshayaasha kala goynta ama xoojinta ajendayaasha gooni u goosadka aan la aqbali karin, maadaama ay kordhin karto xiisadaha siyaasadeed ee gobolka Geeska Afrika.
