In ka badan 5 tan oo qaad sharci-darro ah oo lagu qabtay waqooyiga Jabuuti

Jabuuti (Dawan) – Ciidamada Kastamka Jabuuti ayaa deegaanka Balho ee gobolka Tadjourah ku qabtay 5,304 kiiloogaraam oo qaad ah, kaas oo si sharci-darro ah dalka loogu soo geliyay.

Saraakiisha kastamka ayaa shixnaddan gacanta ku dhigay Arbacadii, kaddib hawlgal baaritaan iyo kontorool ah oo ay ka sameeyeen deegaanka Balho, oo hoos taga degmada Dorra ee waqooyiga Jabuuti.

Mas’uuliyiintu waxay sheegeen in qaadka lagu soo geliyay waddooyin aan rasmi ahayn, iyadoo laga tallaabsaday nidaamka iyo shuruucda u degsan soo dejinta iyo ganacsiga qaadka.

Qabashadan ayaa timid wax ka yar 24 saacadood kaddib markii ciidamada kastamku ay shixnad kale oo qaad sharci-darro ah ku qabteen deegaanka Siciid Gaban, oo u dhexeeya Bondara iyo magaalada Dikhil ee koonfurta dalka.

Hawlgalladan is xigxigay ayaa muujinaya xoojinta dadaallada lagu ilaalinayo waddooyinka waaweyn iyo deegaannada xuduudaha, kuwaas oo ay adeegsadaan kooxaha ku lugta leh ka ganacsiga badeecooyinka sharci-darrada ah.

Agaasimaha Guud ee Kastamka iyo Canshuuraha Dadban ee Jabuuti, Guuleed Axmed Yuusuf, ayaa ammaanay feejignaanta iyo dadaalka ciidamada kastamka, isagoo sheegay in soo dejinta iyo iibinta qaadku ay ku xiran yihiin sharciyo iyo nidaamyo adag.

Wuxuu ka digay in cid kasta oo badeecooyin dalka ku soo gelisa waddooyin aan la oggolayn ay wajihi doonto tallaabooyinka ciqaabeed ee uu dhigayo sharciga.