Tehran (Dawan)– Ilaalada Kacaanka Iran ayaa maanta oo Sabti ah ku dhawaaqay inay bilaabeen weerar rogaal celis ah oo ballaaran oo gantaallo iyo diyaarado aan duuliye lahayn (drones) ah oo lagu beegsanayo Israa’iil, iyagoo sheegay in tallaabadan ay jawaab u tahay weerarro ay Mareykanka iyo Israa’iil ku qaadeen Jamhuuriyadda Islaamiga ah ee Iran.
Bayaan kasoo baxay Ilaalada Kacaanka ayaa lagu sheegay in “jawaab looga dhigayo gardarrada cadowga,” ay Iran billowday wejigii koowaad ee weerarro ballaaran oo ka dhan ah dhulka ay Israa’iil maamusho, iyadoo la adeegsanayo gantaallo iyo diyaarado aan duuliye lahayn.
Waxa ay intaa ku dareen in faahfaahin dheeraad ah lagu soo gudbin doono warbaahinta rasmiga ah.
Wakaaladda wararka Nour News, oo ku dhow hay’adaha amniga Iran, ayaa sheegtay in tobannaan gantaal oo ballistic ah lagu gamay Israa’iil, kuwaas oo qeyb ka ah howlgalka jawaabta ah ee ka dhanka ah weerarrada Mareykanka iyo Israa’iil.
