Itoobiya iyo Faransiiska oo kala saxiixday heshiisyo tamarta iyo Dijitaaleynta ah oo dhan $62 Milyan

Addis Ababa (Dawan) – Itoobiya iyo Faransiiska ayaa kala saxiixday heshiisyo cusub oo ku saabsan tamarta iyo dijitaaleynta oo gaaraya ku dhawaad $62 milyan, kadib kulan dhexmaray Ra’iisul Wasaaraha Itoobiya Abiy Ahmed iyo Madaxweynaha Faransiiska Emmanuel Macron.

Sida uu Abiy Ahmed ku qoray bartiisa X, labada dhinac ayaa yeeshay wada-hadallo laba geesood ah oo muhiim ah, kuwaas oo diiradda lagu saaray arrimo kala duwan oo ay labada dal daneynayaan.

Ra’iisul Wasaaraha Itoobiya iyo Madaxweynaha Faransiiska ayaa sidoo kale goob joog ka ahaa is-weydaarsiga heshiisyo muhiim ah oo u dhexeeya labada dal.

Heshiisyada waxaa kamid ah amaah dhan €54.6 milyan oo loogu talagalay Barnaamijka Tamarta La Cusboonaysiin karo, Tamarta Waarta iyo Dijitaaleynta.

Labada dal ayaa sidoo kale is dhaafsaday qaab-dhismeed cusub iyo qorshe-hawleed la xiriira mashruuca iskaashiga dowladda iyo shirkadaha gaarka loo leeyahay ee tamarta dhulka hoostiisa laga dhaliyo (Geothermal PPP), kaas oo lagu qorsheynayo in laga dhaliyo 150MW oo koronto ah.

Abiy Ahmed ayaa sheegay in heshiisyadan ay qeyb ka yihiin dadaallada lagu xoojinayo iskaashiga dhaqaale, tamarta iyo teknoolojiyadda ee u dhexeeya Itoobiya iyo Faransiiska.