Addis Ababa (Dawan)— Itoobiya iyo Israa’iil ayaa ballaarinaya iskaashigooda dhaqaale iyo tiknoolajiyadeed, iyadoo labada dal ay xoogga saarayaan beeraha, caafimaadka, amniga internetka, biyaha, tamarta iyo maalgashiga.
Danjiraha Israa’iil ee Itoobiya, Avraham Neguise, ayaa wareysi uu siiyay isniintii Wakaaladda Wararka Itoobiya ee ENA ku sheegay in xiriirka taariikhiga ah ee labada dal uu isu beddelayo iskaashi casri ah oo ay hormuud u yihiin tiknoolajiyadda, maalgashiga iyo kobcinta xirfadaha.
“Itoobiya iyo Israa’iil waxay leeyihiin xiriir gaar ah oo salka ku haya waqtiyo aad u fog, kaas oo maanta na soo gaarsiiyay xiriirka labada dal ee hadda jira,” ayuu yiri.
Beeraha ayaa ka mid ah dhinacyada ugu muhiimsan ee iskaashiga. Shirkado Israa’iili ah ayaa Bishoftu ka hirgeliyay mashaariic lagu soo saaro miro iyo khudaar, iyagoo Itoobiya keenaya farsamooyin casri ah oo la xiriira wax-soo-saarka iyo waraabka.
Sida uu sheegay danjiruhu, iskaashigaas ayaa gacan ka geystay kordhinta dhoofinta wax-soo-saarka beeraha Itoobiya, gaar ahaan avocado-da loo iib geeyo suuqyada Yurub iyo Shiinaha. Dib-u-habeynta dhaqaalaha Itoobiya ayaa sidoo kale loo arkaa fursad lagu soo jiidan karo shirkado badan oo Israa’iili ah. Danjiruhu wuxuu tilmaamay macdanta, oo dahabku ku jiro, inay ka mid tahay qaybaha la filayo inuu maalgashigu ku kordho.
