Itoobiya oo ansixisay natiijooyinka 723 deegaan doorasho

Addis Ababa (Dawan) – Guddiga Doorashooyinka Qaranka Itoobiya ayaa si rasmi ah u ansixiyay natiijooyinka 723 ka mid ah 1,139 deegaan doorasho oo lagu qabtay doorashadii guud ee toddobaad ee dalka, sida ay baahisay warbaahinta dowlad deegaanka Soomaalida ee SRTV.

Guddoomiyaha Guddiga Doorashooyinka Qaranka, Melatwork Haylu, ayaa shir jaraa’id oo ay qabatay Arbacadii ku sheegtay in natiijooyinka deegaannadaas la hubiyay, isla markaana si rasmi ah loo ansixiyay.

Waxay sheegtay in xarunta dhexe ee guddiga la gaarsiiyay natiijooyinka 501 kursi oo Golaha Wakiillada Shacabka ah iyo 638 kursi oo baarlamaannada dowlad-deegaannada ah.

Si kastaba ha ahaatee, guddigu ma uusan caddeyn inta ka mid ah kuraastaas ee natiijooyinkooda kama dambaysta ah lagu dhawaaqay, mana uusan shaacin xisbiyada ama musharraxiinta ku guuleystay kuraasta la ansixiyay.

Melatwork Haylu ayaa xustay in guddigu sii wado hubinta iyo ansixinta natiijooyinka deegaannada doorashada ee wali harsan, iyadoo la filayo in natiijooyin dheeraad ah la shaaciyo maalmaha soo socda marka la soo gabagabeeyo xaqiijinta dukumentiyada laga soo gudbiyay goobaha codbixinta.

Guddiga Doorashooyinka ayaan weli shaacin jadwalka lagu soo afjarayo ansixinta dhammaan natiijooyinka doorashada, iyo sidoo kale waqtiga lagu dhawaaqayo natiijada guud ee kama dambaysta ah.