Itoobiya oo daahfurtay xarun Dalxiis oo gobolka isku xireysa

Jigjiga (Dawan) – Dowladda Itoobiya ayaa maanta oo Sabti ah si rasmi ah u daahfurtay wejigii koowaad ee xarunta Dalxiiska Shabeeleey, oo ah mashruuc horumarineed oo ballaaran oo isku xira dhaqanka iyo dhaqaalaha, kana hirgalay Dowlad Deegaanka Soomaalida.

Munaasabadda furitaanka waxaa ka qeybgalay Madaxweynaha Jamhuuriyadda Federaalka Soomaaliya, Xasan Sheekh Maxamuud; Ra’iisul Wasaaraha Itoobiya, Abiy Axmed; Madaxweynaha Dowlad Deegaanka Soomaalida, Mustafe Maxamed Cumar; Madaxweynaha Jamhuuriyadda Jabuuti, Ismaaciil Cumar Geelle; iyo masuuliyiin kale oo sare iyo marti sharaf.

Mashruuca, oo ku kacaya qiyaastii 8 bilyan oo birr Itoobiya ah (una dhiganta 155 milyan oo doollar), ayaa loo qaabeeyey in uu ka tarjumo hidaha iyo dhaqanka Soomaalida, gaar ahaan nolosha iyo hab-dhaqanka bulshooyinka xoolo-dhaqatada ah ee deegaanka.

Dowladda Itoobiya ayaa sheegtay in xaruntani aysan ahayn oo kaliya goob dalxiis, balse ay sidoo kale tahay xarun lagu keydinayo laguna dhiirrigelinayo hidaha iyo dhaqanka Soomaalida.

Ra’iisul Wasaare Abiy Axmed ayaa qoraal uu ku daabacay bartiisa X ku yiri in “Shabeeleey aysan ahayn oo kaliya goob dalxiis, balse ay tahay astaan nool oo muujinaysa hiddaha iyo dhaqanka qaniga ah ee Dowlad Deegaanka Soomaalida, iyadoo si qurux badan u mideyneysa naqshadda casriga ah iyo dhaqammada soo jireenka ah.” Wuxuu intaas ku daray in mashruucan iyo kuwo kale ay ka tarjumayaan horumar la taaban karo oo ku wajahan himilada Itoobiya ee ah in ay noqoto mid ka mid ah dalalka ugu horreeya dalxiiska Afrika.

Mas’uuliyiinta Dowlad Deegaanka Soomaalida ayaa sheegay in xaruntu ay door muhiim ah ka qaadan doonto kobcinta dhaqaalaha deegaanka, abuurista fursado shaqo, iyo soo jiidashada maalgashi gudaha iyo dibadda ah. Deegaanka Shabeeleey, oo dhawaan loo aqoonsaday degmo ismaamul ah, ayaa la filayaa inuu si degdeg ah u kobco kaddib hirgelinta mashruucan, kaas oo qeyb ka ah hindisaha qaran ee “Quudinta Jiilalka,” kuna fidsan dhul gaaraya 385 hektar