Itoobiya oo ka faa’iideysaneysa Jabuuti si ay u gaarsiiso shidaalkeeda suuqyada caalamka

Jabuuti (Dawan) – Itoobiya ayaa qorsheyneysa inay gaaska dabiiciga ah iyo saliidda ceyriinka ah ee laga soo saaro Dowlad Deegaanka Soomaalida u dhoofiso suuqyada caalamka iyadoo adeegsaneysa Marinka Jabuuti, sida lagu sheegay kulan Madaxweyne Ismaaciil Cumar Geelle la yeeshay madaxa Hay’adda Maalgashiga Dowladda Itoobiya.

Madaxweynaha Jabuuti, Ismaaciil Cumar Geelle, ayaa Arbacadii qaabilay Dr. Brook Taye, Agaasimaha Guud ee Hay’adda Maalgashiga Dowladda Itoobiya, oo ah hay’adda qaabilsan maalgashiga Itoobiya.

Sida ay sheegtay Wakaaladda Wararka Jabuuti (ADI), booqashada Dr. Brook Taye ee Jabuuti ayaa la xiriirtay qorshe lagu ballaarinayo iskaashiga istiraatiijiyadeed ee u dhexeeya Itoobiya, Dangote Group iyo Jamhuuriyadda Jabuuti, gaar ahaan dhinaca tamarta.

Qorshaha la horgeeyay Madaxweyne Geelle ayaa ka kooban laba weji. Wejiga koowaad wuxuu dhigaya dhismaha dhuun qaadi doonta shidaalka la sifeeyay, taas oo ka bilaaban doonta dekedda Jabuuti kuna dhammaan doonta deegaanka Daweleh ee Itoobiya.

Wejiga labaad ayaa diiradda saaraya dhismaha dhuumo loogu talagalay gaaska dabiiciga ah iyo saliidda ceyriinka ah ee Itoobiya, si looga dhoofiyo goobaha shidaalka iyo gaaska ee ku yaalla Dowlad Deegaanka Soomaalida, looguna gudbiyo suuqyada caalamka iyadoo la adeegsanayo Marinka Jabuuti.

Madaxweyne Geelle ayaa si wanaagsan u soo dhaweeyay mashruuca, isagoo sidoo kale soo bandhigay hannaan lagu hirgelinayo iskaashiga cusub ee labada dal, sida lagu sheegay warbixinta Wakaaladda Wararka Jabuuti (ADI).

Waxaa sidoo kale kulanka ka qeyb galay Safiirka Itoobiya u fadhiya Jabuuti, Legesse Tulu. Dhinaca Jabuuti, waxaa goob joog ahaa Wasiirka Tamarta iyo Kheyraadka Dabiiciga ah, Dr. Djama Mohamed Hassan, Xoghayaha Guud ee Madaxtooyada, Mohamed Abdillahi Waceys, iyo Kormeeraha Guud ee Dowladda, Hassan Issa Sultan.

Mashruucan, haddii la hirgeliyo, wuxuu xoojin karaa doorka Jabuuti ee marinka ganacsiga iyo tamarta ee Geeska Afrika, isagoo Itoobiya siinaya waddo muhiim ah oo ay ku gaarsiiso saliidda iyo gaaska suuqyada caalamka.