Itoobiya oo ka mid noqotay dalalka mudnaanta u leh qorshaha gurmadka Maraykanka

Addis Ababa (Dawan) – Dowladda Maraykanka ayaa ku dhawaaqday qorshe gargaar bini’aadannimo oo ka badan $1 bilyan, iyadoo Itoobiya lagu daray dalalka ugu muhiimsan ee ka faa’iidaysanaya maalgelintan cusub.

Lacagtan ayaa loo sii marin doonaa Hay’adda Qaramada Midoobay u qaabilsan Carruurta (UNICEF) iyo Barnaamijka Cuntada Adduunka (WFP), kuwaas oo ka shaqeeya bixinta adeegyada gargaarka ee dalalka ay saameeyeen colaadaha, abaaraha iyo dhibaatooyinka bani’aadannimo.

Sida lagu sheegay war-saxaafadeed ay soo saartay Wasaaradda Arrimaha Dibadda Maraykanka, in ka badan $218 milyan ayaa loo qoondeeyay UNICEF, halka in ka badan $800 milyan loo asteeyay WFP. Maalgelintan ayaa lagu taageerayaa hawlgallo bini’aadannimo oo ka socda in ka badan 40 dal, iyadoo Itoobiya si gaar ah loogu xusay dalalka ay baahiyaha bani’aadannimo aadka ugu sarreeyaan.

Qorshahan cusub ayaa diiradda saaraya bixinta adeegyada cuntada, nafaqada, caafimaadka, ilaalinta carruurta, biyaha iyo nadaafadda, kuwaas oo muhiim u ah malaayiinta Itoobiyaanka ah ee ay saameeyeen colaadaha, barakaca iyo isbeddelka cimilada.

Dowladda Mareykanka ka ayaa sheegtay in maalgelintani ay qayb ka tahay dib-u-habayn lagu sameynayo nidaamka gargaarka caalamiga ah, si loo hubiyo in dhaqaalaha si degdeg ah oo hufan u gaaro dadka u baahan. Waxa ay sidoo kale xustay in hay’adaha fulinaya gargaarka ay awood u yeelan doonaan inay gaarsiiyaan gurmadka muddo gaaban gudaheed, mararka qaarna 24 saacadood gudahood.

Itoobiya ayaa weli ka mid ah dalalka Afrika ee ay ka jiraan baahiyo bani’aadannimo oo baaxad leh, iyadoo malaayiin qof ay u baahan yihiin gargaar dhinacyada cuntada, caafimaadka iyo adeegyada aasaasiga ah.

Maalgelintan cusub ayaa la filayaa inay xoojiso dadaallada samafalka ee ka socda Itoobiya, isla markaana sare u qaaddo awoodda hay’adaha gargaarka ee wax ka qabashada xaaladaha degdegga ah ee dalka ka jira.