Addis Ababa (Dawan) — Itoobiya waxay qaaday tallaabo cusub oo ka mid ah qorshaheeda ay ku doonayso inay dalka uga dhigto xarun muhiim u ah isu-socodka badeecadaha iyo adeegyada saadka ee Afrika, kaddib markii la daahfuray wejiga koowaad ee ballaarinta xarunta saadka ee Mojo, sida ay sheegtay Wakaaladda Wararka Itoobiya ee ENA.
Xaruntan oo ku fadhida dhul dhan 60 hektar ayaa loo diyaariyey inay sannadkii maareyso ilaa hal milyan oo konteenarro 20-foot ah, taas oo laba jibbaaraysa awooddeedii hore oo ahayd qiyaastii 500 kun.
Ra’iisul Wasaaraha Itoobiya Abiy Axmed, oo ka hadlay munaasabadda daahfurka khamiistii , ayaa sheegay in dowladdiisu sii xoojin doonto mashaariicda iyo kaabayaasha Itoobiya ka caawinaya inay noqoto xarunta saadka ee qaaradda Afrika. “Waxaan sii xoojin doonnaa hawlaha Itoobiya ka dhigi kara xarunta saadka ee Afrika” ayuu yiri abiy Axmed
Xaruntu waxay qayb ka tahay qorshe ballaaran oo Itoobiya ku doonayso inay isku xirto gaadiidka, tareennada, marinada ganacsiga iyo xarumaha wax-soo-saarka, si loo fududeeyo dhaqdhaqaaqa badeecadaha gudaha iyo kuwa u kala gudbaya suuqyada gobolka.
Itoobiya waa dal aan bad lahayn, sidaas darteed hufnaanta silsiladda saadka waxay si toos ah muhiim ugu tahay awoodda uu dalku u leeyahay inuu badeecado dibadda u dhoofiyo ama kasoo dejiyo.
Dowladda Itoobiya waxay sidoo kale xarunta Mojo u aragtaa qayb ka mid ah diyaar-garowga dalka ee ka faa’iidaysiga Aagga Ganacsiga Xorta ah ee Qaaradda Afrika — AfCFTA, kaas oo loogu talagalay inuu fududeeyo ganacsiga iyo isku socodka badeecadaha dalalka Afrika. Xarunta cusub waxaa ku yaalla terminalo iyo bakhaarro casri ah, waxaana sidoo kale gudaha dalka lagu baakadeyn karaa badeecooyinka qalalan ee jumlada ah.
