New York (Dawan)- Dowladda Itoobiya ayaa qorsheyneysa in awoodda koronto-dhalinta dalka ay gaarsiiso ilaa 14,000 megawatt marka la gaaro sannadka 2030, iyadoo tamarta nadiifta ah loo adeegsanayo ballaarinta warshadaha, kobcinta dhaqaalaha iyo shaqo-abuurka.
Madaxweynaha Itoobiya, Taye Atske Selassie, ayaa qorshahan kaga hadlay Madasha Hoggaamiyeyaasha Sare ee “Delivering Electrify Now”, oo qeyb ka ahayd Shirka Caalamiga ah ee Tamarta La Cusboonaysiin Karo ee lagu qabtay magaalada New York.
Madaxweyne Taye ayaa sheegay in dunidu ay u baahan tahay inay ka gudubto xoogga la saarayo koronto-dhalinta oo keliya, loona wareego dhismaha shabakadaha gudbinta iyo qeybinta, kaydinta korontada iyo maalgelinta kaabeyaasha tamarta.
“Koronto-dhalin aan lahayn shabakado, kaydin iyo hay’ado adeeg oo awood leh ma horseedi karto isbeddel dhaqaale,” ayuu yiri Madaxweynaha Itoobiya.
Wuxuu ku baaqay in maalgelinta caalamiga ah taageerto dhammaan silsiladda korontada, laga bilaabo wax-soo-saarka iyo gudbinta ilaa qeybinta, kaydinta iyo gaarsiinta macaamiisha ku nool deegaannada ugu dambeeya.
In ka badan 95% awoodda koronto-dhalinta ee hadda Itoobiya waxay ka timaaddaa ilo la cusboonaysiin karo. Dowladda ayaa Biyo-xireenka Weyn ee Itoobiya ee GERD iyo mashaariicda kale ee tamarta u aragta saldhig lagu ballaarinayo helitaanka korontada laguna dardargelinayo warshadeynta dalka.
