Addis Ababa (Dawan) – Hay’adda Qaxootiga Qaramada Midoobay ee UNHCR ayaa sheegtay in in ka badan 100,000 qof oo ka qaxay colaadaha Koonfurta Suudaan inay galeen gobolka Gambella ee Itoobiya, halkaas oo ay ka jiraan baahiyo bani’aadannimo.
Warbixin ay UNHCR soo saartay toddobaadkan ayaa sheegtay in barakaca ballaaran uu bilowday kadib markii ciidamada SSPDF ay 10-kii Maarso 2026 la wareegeen degmada Akobo ee gobolka Jonglei, taas oo sababtay in kumannaan rayid ah ay u qaxaaan Itoobiya iyagoo maraya Tiergol, Kankan, Thakyaak iyo marinno kale oo aan rasmi ahayn.
UNHCR ayaa sheegtay in dadka barakacay ay intooda badan ka yimaadeen degmooyinka Nyirol, Uror iyo Akobo, iyagoo markii hore degay qeybo kamid ah degmada Akobo Woreda, balse markii dambe u gudbay deegaanno kale oo ku yaalla gobolka Nuer Zone, oo ay kamid yihiin Kankan, Muon, Matar iyo Tormorok.
Qiimeyn degdeg ah oo ay sameeyeen hay’adaha bani’aadannimada ayaa lagu sheegay in qiyaastii 85,000 qof ay galeen gobolka Gambella si ay uga badbaadaan colaadaha, halka maamulka deegaanka Wantawo Woreda uu sheegay in 12,218 qaxooti cusub ay gaareen deegaanka Tormorok.
