Jigjiga (Dawan) – Xisbiga Barwaaqo ee haya talada dalka Itoobiya ayaa dardargeliyay ololihiisa doorashada, gaar ahaan deegaanada Dowlad Deegaanka Soomaalida, iyadoo musharraxiintiisa iyo mas’uuliyiin heer deegaan ah ay socdaallo, isu-soo-baxyo iyo kulamo dadweyne ka wadaan degmooyin kala duwan.
Warbixinno ay baahisay SRTV Somali ayaa muujinaya in ololaha xisbiga uu ka socdo dhowr goobood, oo ay ku jiraan gobollada Shabeelle, Afdheer, Faafan iyo deegaanno kale. Musharraxiinta Xisbiga Barwaaqo ayaa kulamo la yeeshay taageerayaal, odayaal dhaqameed, maamulka degmooyinka iyo qaybaha bulshada, iyagoo soo bandhigaya waxqabadka xisbiga iyo ballanqaadyada horumarineed ee ay doonayaan inay sii wadaan.
Ololaha ayaa sidoo kale lagu lamaaneeyay furitaanka iyo soo bandhigidda mashaariic horumarineed, gaar ahaan adeegyada bulshada sida biyaha, waddooyinka iyo kaabayaasha aasaasiga ah. Tusaale ahaan, degmada Baarey ee gobolka Afdheer waxaa laga furay mashruuc weyn oo biyo-gelin ah, kaas oo lagu sheegay inuu ku kacay 357 milyan oo birr, una dhiganta qiyaastii 2.28 milyan oo dollar. Munaasabaddaas waxaa ka qeyb galay mas’uuliyiin sare oo ka tirsan Dowlad Deegaanka Soomaalida, Xisbiga Barwaaqo iyo hay’ado ay ka mid tahay UNICEF.
Mas’uuliyiinta xisbiga ayaa farriimahooda ololaha ku xoojinaya in mashaariicda laga hirgeliyay deegaanka ay qayb ka yihiin waxqabadka maamulka jira, iyagoo bulshada ugu baaqaya inay ilaashadaan kaabayaasha la dhisay, isla markaana taageeraan sii socoshada qorshayaasha horumarineed.
