Muqdisho, Abriil 9 (Dawan) – Jaamacadda Ummadda Soomaaliyeed (SNU) ayaa heshiisyo istiraatiijiyad ah oo dhinaca teknoolajiyada iyo cilmi-baarista ah la saxiixatay hay’ado laga leeyahay dalka Shiinaha, ujeedkuna yahay casriyeynta nidaamka waxbarashada sare ee dalka, sida lagu sheegay qoraal rasmi ah oo ka soo baxay jaamacadda Arbacadii.
Guddoomiyaha Jaamacadda, Maxamed Maxamuud Maxamed, ayaa hoggaaminayay wafdi heer sare ah oo gaaray magaalada Beijing si ay u saxiixaan is-afgarad (MoU) lala galayo shirkado iyo machadyo aqooneed, si loogu daro teknoolajiyada casriga ah manhajka waxbarashada dadweynaha ee Soomaaliya, sida jaamacaddu sheegtay.
Qayb muhiim ah oo ka mid ah socdaalka wafdiga ayaa ahaa heshiis dhinaca horumarinta teknoolajiyada ah oo lala saxiixday shirkadda Beijing Hisign Technology Co., Ltd. Sida ku cad xogta shirkadda. Hisign waa shirkad Shiineys ah oo horumarsan, taas oo ku takhasustay garaadka macmalka ah (AI) iyo aqoonsiga biometric-ga, sida faraha iyo wejiga, kuwaas oo si ballaaran looga isticmaalo amniga qaranka Shiinaha.
Sida jaamacaddu sheegtay, Jaamacadda Ummadda iyo Hisign waxay iska kaashan doonaan mashaariic cilmi-baaris wadajir ah. Wafdiga ayaa sidoo kale kormeer ku tegay xarunta dhexe ee shirkadda si ay u soo arkaan horumarka laga gaaray dhinaca xogta waaweyn (big data) iyo aragtida mashiinnada (machine vision), iyadoo ujeedku yahay in qalabkan lagu daro manhajka jaamacadda, sida lagu xaqiijiyay qoraalka jaamacadda.
Dhinaca kale, wafdiga jaamacadda waxa uu heshiis iskaashi la saxiixday Machadka China-Africa (CAI). Machadkan oo la dhisay sannadkii 2019-kii, kana tirsan Akadeemiyada Sayniska Bulshada ee Shiinaha, ayaa u adeega heer qaran ah oo loogu talagalay isweydaarsiga aqoonta, sida lagu sheegay axdiga machadka.
