Beledweyne (Dawan)– Dowlad Goboleedka Hirshabeelle ayaa shaaciyay in magaalada Beledweyne la qorsheynayo in sanadkan laga furo xarun cusub oo ay yeelanayso Jaamacadda Ummadda Soomaaliyeed, iyadoo maamulka uu sheegay in baahida waxbarashada sare iyo tirada ardayda magaalada ay horseedeen qorshahan.
Wasiirka Waxbarashada Hirshabeelle, Saciid Hagar Camalow, oo wareysi siiyay podcast Wakiil oo ka baxa Dawan TV, ayaa sheegay inay muddo ka shaqeynayeen sidii Jaamacadda Ummadda Soomaaliyeed ay faraceedii ugu horreeyay uga furan lahayd Hirshabeelle, iyadoo Beledweyne loo asteeyay magaalada ugu horreysa.
Wasiirka ayaa sheegay in qiyaastii 20 boqolkiiba ardayda wax ka barata Jaamacadda Ummadda Soomaaliyeed ay ka yimaadaan magaalada Beledweyne, taas oo uu ku tilmaamay sababta ugu weyn ee keentay qorshaha lagu dhisayo laan rasmi ah oo jaamacaddu ku yeelato magaalada.
“Sanadkan waxaan qorshaha ku jirnaa in Jaamacadda Ummadda faraceeda la geeyo Hirshabeelle, gaar ahaan magaalada Beledweyne, haddii Alle idmo. Waa qorshe aan muddo badan ka soo shaqeynaynay,” ayuu yiri Wasiir Saciid Hagar Camalow.
