Jabuuti (Dawan)— Jabuuti iyo Bangiga Adduunka ayaa shaqo-abuurka iyo horumarinta tamarta ka dhigay mudnaanta qorshe iskaashi oo shan sano ah, sida ay sheegtay Wakaaladda Wararka Jabuuti.
Madaxweynaha Jabuuti, Ismaaciil Cumar Geelle, ayaa Talaadadii Madaxtooyada ku qaabilay Madaxweyne Ku-xigeenka Bangiga Adduunka, Ousmane Dione, oo dalka ku jooga booqasho shaqo. Labada dhinac ayaa dib u eegay mashaariicda hadda socda, waxayna ka wada hadleen dhinacyada cusub ee lagu ballaarin karo iskaashiga Jabuuti iyo Bangiga Adduunka.
Qorshaha shaqo-abuurka ayaa diiradda saaraya sidii tababarrada waxbarasho iyo kuwa xirfadeed loo waafajin lahaa baahida suuqa shaqada ee Jabuuti iyo gobolka, sida ay sheegtay wakaaladdu. Dhinaca tamarta, Bangiga Adduunka ayaa la filayaa inuu Jabuuti ka taageero ballaarinta isticmaalka tamarta la cusboonaysiin karo.
