Jabuuti (Dawan) – Ciidamada Jabuuti iyo kuwa Faransiiska ayaa yeeshay kulankii ugu horreeyay ee Guddiga Wadahadalka Istiraatiijiga ah ee Milatari, oo ah hannaan cusub oo lagu xoojinayo iskaashiga difaaca ee labada dal.
Kulanka ayaa ka dhacay Taliska Saraakiisha “Hassan Bassoma”, xarunta Madaxtooyada Xiriirka Caalamiga ee Ciidamada Jabuuti, waxaana ka qeyb galay saraakiil sare oo ka kala socday labada dal.
Wafdiga Faransiiska waxaa hoggaaminayay General Patrick Vaglio, iyadoo ay qeyb ka ahaayeen mas’uuliyiin ka socday Maamulka Xiriirka Caalamiga iyo Istiraatiijiyadda ee Wasaaradda Ciidamada Faransiiska, ciidamada Faransiiska iyo howlgalka difaaca ee safaaradda Faransiiska.
Markii uu wafdigu soo gaaray Jabuuti, waxaa qaabilay Agaasimaha Guud ee Xiriirka Caalamiga ee Ciidamada Jabuuti, Koloneel Ibrahim Sakariye Sheekh. Kulanka waxaa sidoo kale ka qeyb galay saraakiil sare oo ka tirsan Ciidamada Jabuuti, oo ay ku jiraan Taliyaha Ciidanka Cirka, Madaxa Xafiiska Qorsheynta ee Shaqaalaha Guud, Taliyaha Iskuulka Askariga ee Hol Hol iyo Taliyaha Kumeelgaarka ee Ciidanka Badda.
