Paris (Dawan)— Jabuuti iyo Faransiiska ayaa isku raacay inay diyaariyaan heshiis iskaashi oo dhinaca shaqada ah, kaas oo lagu xoojinayo wadaagga khibradaha ku saabsan shaqo-abuurka, tababarrada, hawlgabka iyo badbaadada bulshada, sida ay sheegtay Wakaaladda Wararka Jabuuti ee ADI.
Wasiirka Shaqada Jabuuti Yoonis Cali Geedi iyo dhiggiisa Faransiiska Jean-Pierre Farandou ayaa arrintan kaga wada hadlay kulan Khamiistii ka dhacay Paris. Geedi waxaa kulanka ku weheliyay Safiirka Jabuuti u fadhiya Faransiiska Ayeid Mousseid Yahya.
Labada wasiir ayaa isla qaatay mabda’a ah in heshiis dhex mara wasaaradahooda la diyaariyo, si loo ballaariyo iskaashiga loona fududeeyo wadaagga aqoonta, waayo-aragnimada iyo hababka shaqo ee labada dal.