Jabuuti (Dawan) – Jabuuti iyo Japan ayaa ka wada hadlay qorshayaal lagu ballaarinayo iskaashiga dhinaca tamarta, iyadoo diiradda la saarayo tamarta la cusboonaysiin karo iyo kordhinta helitaanka korontada ee deegaannada miyiga, sida ay sheegtay Wakaaladda Wararka Jabuuti ee ADI.
Wasiirka Tamarta Jabuuti, Jaamac Maxamed Xasan, ayaa Arbacadii xafiiskiisa kula kulmay Safiirka Japan ee Jabuuti, Okochi Akihiro.
Labada dhinac ayaa dib u eegay iskaashiga tamarta, iyagoo si gaar ah uga wada hadlay horumarinta tamarta dhulka hoostiisa, koronto-siinta miyiga iyo suurtagalnimada hirgelinta tiknoolajiyadda tamarta qorraxda ee la isugu geeyo (CSP).
Wasiir Jaamac Maxamed Xasan ayaa sheegay in ballaarinta helitaanka korontada ee deegaannada miyiga ay tahay mudnaan qaran oo muhiim ah, isagoo ku boorriyay in la kordhiyo ka faa’iidaysiga khibradda Japan, gaar ahaan dhinacyada tamarta dhulka hoostiisa.
Wuxuu sidoo kale xusay in Jabuuti ay leedahay khubaro maxalli ah oo ka shaqeeya tamarta nadiifta ah, balse ay u baahan tahay iskaashi farsamo oo dheeraad ah si loo dardargeliyo mashaariicda mustaqbalka.
Safiir Okochi Akihiro ayaa dhankiisa soo bandhigay mashaariic tamarta la cusboonaysiin karo oo Japan ay ka taageerto Yoboki iyo Omar Jaggaa, kuwaas oo isku daraya tamarta qorraxda iyo taageerada hawlaha dakhli-abuurka, sida ay sheegtay ADI.
Waxa uu sidoo kale sheegay in wafdi ganacsato Japan ah la filayo inuu booqdo Jabuuti si uu u qiimeeyo mashruuc yar oo tamarta qorraxda iyo dabaysha isku-dhafan ah oo laga qorsheeyay deegaanka Randa ee gobolka Tadjourah.
