NEW YORK (Dawan) – Wasiirka Arrimaha Dibadda Jabuuti, Cabdulqaadir Xuseen Cumar iyo la-taliyaha gaarka ah ee Madaxweynaha Mareykanka u qaabilsan arrimaha Afrika iyo Bariga Dhexe Massad Boulos ayaa ka wada hadlay sidii loo xoojin lahaa ammaanka Badda Cas iyo marin-biyoodka istaraatiijiga ah ee Baabul-Mandab, xilli ay sii kordhayaan khataraha amni ee saameynaya maraakiibta iyo ganacsiga caalamiga ah.
Kulanka oo ka dhacay magaaladda New York ayaa si gaar ah diiradda loogu saaray ilaalinta xorriyadda isu-socodka maraakiibta, sugidda marinnada ganacsiga iyo xoojinta iskaashiga labada dal ee dhinaca ammaanka badda.
Labada dhinac ayaa isku raacay muhiimad ay leedahay in la mideeyo dadaallada lagu ilaalinayo xasilloonida Badda Cas iyo Baabul-Mandab, oo ka mid ah marinnada ugu muhiimsan ganacsiga caalamka.
