Jabuuti (Dawan) – Wasiirka Arrimaha Dibadda iyo Iskaashiga Caalamiga ee Jamhuuriyadda Jabuuti, Cabdilqaadir Xuseen Cumar, ayaa Axaddii wada hadal dhinaca telefoonka ah la yeeshay Wasiirka Arrimaha Dibadda, Iskaashiga Caalamiga iyo Masaarida Dibadda ee Masar, Badr Cabdulcaadi, iyagoo ka wada hadlay xoojinta xiriirka iyo iskaashiga labada dal.
Sida ay baahisay Wakaaladda Wararka Jabuuti, labada wasiir ayaa dib u eegis ku sameeyay xaaladda guud ee xiriirka labada waddan, iyagoo si gaar ah diiradda u saaray fursadaha lagu horumarin karo iskaashiga dhinacyada kala duwan ee ay wadaagaan.
Wadahadalka ayaa sidoo kale lagu falanqeeyay sidii loo sii xoojin lahaa iskaashiga jira, loona ballaarin lahaa dhinacyada cusub ee wada shaqeynta, si labada dal ay uga faa’iideystaan xiriirka taariikhiga ah iyo iskaashiga soo jireenka ah ee ka dhexeeya.