Jabuuti iyo Tunisia oo kala saxiixday dhowr heshiis oo dhanka caafiamadka ah

Tunis (Dawan) – Xarunta Cisbitaalka Jaamacadeed ee Jabuuti (CHU) ayaa afar heshiis oo iskaashi caafimaad ah la saxiixatay qaar ka mid ah cisbitaallada ugu waaweyn dalka Tunisia, sida ay baahisay Wakaaladda Wararka Jabuuti (ADI) maalintii Axadda.

Heshiisyadan ayaa ujeedkoodu yahay in lagu ballaariyo awoodda daryeelka caafimaadka ee dalka, gaar ahaan qaybaha beddelidda kelyaha, cudurrada wadnaha, adeegga teleradiology-ga (akhrinta raajada ee fogaan-aragga), iyo adeegyada daryeelka caafimaadka degdegga ah.

Heshiisyadan ayaa si rasmi ah loo meel mariyay intii uu Agaasimaha Guud ee Cisbitaalka Jaamacadeed ee Jabuuti, Dr. Cumar Maxamuud Ismaaciil ku guda jiray safar shaqo oo magaalooyinka Tunis iyo Sfax ahintii u dhexeysay 12 illaa 15 May. Safarkaasi waxaa wafdiga ka mid ahaa Madaxa Qaybta Kelyaha, Dr. Daahir Cabdulkarim Cumar, iyo Dhaqtarka ku takhasusay cudurrada wadnaha (Interventional Cardiologist), Dr. Maxamed Xuseen Ibraahim.

Heshiisyadan ayaa dhex maray Xarunta Cisbitaalka Jaamacadeed ee Hédi Chaker oo ku taalla Sfax iyo CHU La Rabta, kuwaas oo ka mid ah xarumaha caafimaad ee ugu waaweyn dowladda Tunisia. Mas’uuliyiinta ayaa ka wada hadlay istiraatiijiyado iskaashi oo lagu xoojinayo nidaamka caafimaadka Jabuuti iyo sidii khibradaha caafimaad loogu kala wareejin lahaa labada dal.

Wafdiga waxay sidoo kale la kulmeen Wasiirka Caafimaadka Tunisia, Dr. Mustapha Ferjani, mas’uuliyiinta cisbitaallada, dhaqaatiirta ku takhasustay cilmiga caafimaadka, iyo wakiillo ka socday bahwadaagta kale si looga arrinsado baahida sii kordheysa ee Jabuuti u qabto daryeel caafimaad oo takhasusi ah.

Jabuuti, oo tirada dadkeeda lagu qiyaaso qiyaastii 1.15 milyan oo qof, ayaa leh tiro dhaqaatiir ah oo aad u hooseysa, taas oo lagu qiyaaso ku dhowaad 2.11 dhaqtar 10,000-kii qofba, sida ay muujinayaan xogta Ururka Caafimaadka Adduunka (WHO).

“Iskaashiyadan waxaa laga filayaa inay si tartiib-tartiib ah u xoojiyaan isku-filnaanshaha xarumaha caafimaadka qaranka Jabuuti, gaar ahaan maaraynta xanuunnada kelyaha iyo cudurrada wadnaha iyo xididdada dhiigga,” ayaa lagu yirim qoraal kasoo baxay Jaamacadda Jabuuti.

Jabuuti ayaa sheegtay in heshiisyadani ay qayb ka yihiin iskaashiga ay la leedahay cisbitaallada Tunisia si loo xoojiyo adeegyada daryeelka caafimaadka.