Ankara (Dawan)- Jabuuti iyo Turkiga ayaa ku heshiiyay inay ballaariyaan iskaashiga dhinacyada arrimaha diinta, maamulka awqaafta iyo hidaha dhaqanka kadib wada-hadallo ka dhacay Ankara oo dhexmaray Wasiirka Arrimaha Islaamka iyo Hantida Waqafka Jabuuti, Muumin Xasan Barreh, iyo mas'uuliyiin Turki ah, sida ay sheegtay Wakaaladda Wararka Dowladda Jabuuti ee ADI Isniintii.
Wada-hadallada oo dhacay intii lagu guda jiray booqasho rasmi ah oo uu wafdiga Jabuuti ku tagay Turkiga kadib martiqaad ka yimid hoggaanka Arrimaha Diinta ee Turkiga (Diyanet), ayaa diiradda lagu saaray is-weydaarsiga khibradaha, horumarinta mashaariic wadajir ah iyo xoojinta iskaashiga hay'adaha ee maamulka arrimaha diinta iyo hantida awqaafta, sida ay sheegtay ADI.
Labada dhinac ayaa sidoo kale ka wada hadlay ilaalinta hiddaha diimeed ee Islaamka, gaar ahaan Masjidka Weyn ee Suldaan Cabdilxamiid Labaad ee Jabuuti, kaas oo ay ku tilmaameen astaan muujinaysa saaxiibtinimada labada dal.
