Jabuuti (Dawan)- Madaxweyne Ismaaciil Cumar Geelle ayaa magaalada Jabuuti ku qaabilay guddoomiyaha guddiga Saaxiibtinimada Baarlamaanka ee Turkiga iyo Jabuuti, Mustafa Alkayis, iyadoo labada dhinac ay ka wada hadleen sidii loo xoojin lahaa iskaashiga labada dal ee dhinacyada diblomaasiyadda, ganacsiga, dhaqaalaha iyo tacliinta sare.
Kulanka, oo ka dhacay Xarunta Madaxtooyada Jabuuti, ayaa qayb ka ahaa booqasho dhowr maalmood ah oo Mustafa Alkayis ku joogo dalka Jabuuti. Sida ay baahisay Wakaaladda Wararka Jabuuti, ergayga Turkiga ayaa Madaxweyne Geelle gaarsiiyay farriin uu ka siday Madaxweynaha Turkiga, Recep Tayyip Erdoğan, taas oo uu ugu hambalyeynayay sannad-guurada 49-aad ee madaxbannaanida Jabuuti.
Intii uu socday kulanka, labada dhinac waxay dib u eegis ku sameeyeen heerka xiriirka u dhexeeya Jabuuti iyo Turkiga, iyagoo ka wada hadlay fursadaha lagu sii ballaarin karo iskaashiga laba geesoodka ah. Wadahadallada ayaa si gaar ah diiradda loogu saaray xoojinta xiriirka diblomaasiyadeed, kobcinta iskaashiga dhaqaale iyo ganacsi, ballaarinta iskaashiga tacliinta sare, iyo kordhinta booqashooyinka heerarka sare ee labada dal.
