Jabuuti: Madaxweyne Geelle oo xarigga ka jaray mashaariic horumarineed

Jabuuti (Dawan)— Madaxweynaha Jamhuuriyadda Jabuuti, Ismaaciil Cumar Geelle, ayaa maanta xarigga ka jaray mashaariic horumarineed oo isku dhafan, kuwaas oo laga hirgeliyey xaafadda Balbala ee duleedka caasimadda Jabuuti.

Mashaariicdan oo tiradoodu gaareyso afar, ayaa isugu jira suuq ganacsi oo casri ah, xarun amni oo booliska ah, Xarun qaabilsan Horumarinta Bulshada , iyo goobo loogu tala galay ciyaaraha kala duwan.

Suuqa cusub ayaa ka kooban 76 dukaan oo cabbirro kala duwan leh, kuwaas oo laga heli karo adeegyada ay bulshadu u baahantahay.

Dukaamada yaryarka aha ayaa lagu kireyn doona lacag dhan 15,000 oo faranka Jabuuti bishii, halka dukaamada waaweyn ee ganacsiyada lagu heli doono 25,000 ilaa 30,000 faran bishii. Dowladda ayaa sidoo kale dejisay dhiirrigelin ganacsi, iyadoo ganacsatada laga dhaafay kirada lixda bilood ee ugu horreysa.

Xarunta Horumarinta Bulshada ayaa iyaduna leh maktabad, qol kombiyuutarro, masrax, goobo lagu barto farshaxanka iyo tolidda, iyo hool shirar, taas oo lagu xoojinayo waxbarashada iyo horumarinta aqoonta bulshada.

Goobaha ciyaaraha ayaa laga heli doona fursado kala duwan iyo in lagu qabto ciyaaraha ay ka mid yihiin kubadda cagta, kubadda koleyga, kubadda gacanta iyo orodka, iyadoo loo kala saaray xarumo gaar ah oo loogu talagalay wiilasha iyo gabdhaha.

Dhanka kale, xarunta amniga ee ciidamada Daraawiishta ayaa loogu tala galay in ay buuxiso dhammaan shuruudaha lagama maarmaanka u ah fulinta waajibaadka amni ee ilaalinta muwaadiniinta iyo hantidooda

Madaxweynaha Jabuuti ayaa sheegay in mashaariicdan ay yihiin tiir muhiim u ah horumarka magaalooyinka iyo bulshada, isla markaana ay door ka qaadanayaan abuurista shaqooyin, la-dagaallanka balwadda iyo dambiyada dhallinyarada, iyo xoojinta nabadda iyo amniga. Waxa uu intaas ku daray in mashaariicdan lagu hirgeliyey iskaashi ay la yeesheen Hay’adda Horumarinta Faransiiska, taas oo ka tarjumaysa iskaashi muddo dheer soo jiray oo u dhexeeya Jabuuti iyo Faransiiska.

“Helitaanka dhismayaashan dadweyne waxay dalka u tahay tallaabo weyn oo dhanka qorsheynta magaalooyinka ah, isla markaana waxay muwaadiniinta siinayaan adeegyo muhiim u ah caafimaadkooda iyo horumarkooda,” ayuu yiri Madaxweyne Geelle, isaga oo ugu baaqay shacabka inay si wanaagsan uga faa’iideystaan una ilaaliyaan kaabeyaashan cusub.