Jabuuti 19 Maarso (Dawan ) – Dowladda Jabuuti ayaa Khamiistii si cad u beenisay inay wax lug ah ku lahayd go’aan muran dhaliyay oo uu gaaray Guddiga Rafcaanka ee Xiriirka Kubadda Cagta Afrika (CAF) ee la xiriira Koobka Qaramada Afrika 2025.
War wadajir ah oo ay soo saareen Wasiiru-dowlaha Isboortiga Xasan Maxamed Kaamil, Guddoomiyaha Xiriirka Kubadda Cagta Jabuuti (FDF) Suleymaan Xasan Waberi, iyo xubin ka tirsan guddiga rafcaanka CAF Maxamed jaamac, ayaa lagu diiday eedeymo lagu faafiyay baraha bulshada oo sheegaya in Jabuuti saameyn ku yeelatay go’aankaasi.
Eedeymaha ayaa tilmaamay in Jabuuti ay door ku lahayd go’aan la xiriira in axulka Senegal laga soo celiyo koobkii ay ku guuleysatay kadibna lagu wareejiyay xulka Morocco.
Maxamed ayaa si cad u sheegay inuusan wax door ah ku lahayn arrintaas, isagoo xusay inuusan ka qeyb gelin dhageysiga ama go’aan qaadashada kiiska.
“Ma aanan ka qeyb gelin dhageysiga, mana aanan ka mid ahayn go’aan qaadashada,” ayuu yiri.