Jabuuti (Dawan)- Dowladda Jabuuti ayaa si adag u cambaareysay isku-daygii weerar ee lagu qaaday magaalada barakeysan ee Maka, iyadoo dhacdada ku tilmaantay xadgudub ka dhan ah xurmada goobaha Islaamka ugu barakeysan.
War ay baahisay Wakaaladda Wararka Jabuuti ee ADI Arbacadii ayaa lagu sheegay in Jabuuti ay mar kale xaqiijisay garab-istaaggeeda Boqortooyada Sacuudi Carabiya iyo taageerada ay u hayso tallaabooyinka ay ku difaacayso dhulkeeda, dadkeeda iyo goobaha barakeysan.
Ciidamada difaaca cirka Sacuudiga ayaa Talaadadii qabtay oo burburiyay diyaarad aan duuliye lahayn oo ku wajahneyd Maka, ka hor inta aysan gelin hawada xaddidan ee magaalada, sida uu sheegay isbahaysiga uu Sacuudigu hoggaamiyo.