Jabuuti, 9 Febraayo 2026 (Dawan) — Dowladda Jabuuti ayaa daah-furtay madal aqoonsi qaran oo dhijitaal ah oo ku shaqeysa mobilka, taas oo looga golleeyahay in lagu ballaariyo helitaanka adeegyada dadweynaha iyo kuwa gaarka loo leeyahay, korna loogu qaado macaamilka dhijitaalka ah, isla markaana lagu taageero isbeddelka guud ee dhaqaalaha dalka.
Nidaamkan ayaa Isniintii lagu daah-furay gabagabadii Madasha Qaran ee Aqoonsiga Dhijitaalka ah, oo ahayd munaasabad socotay muddo laba maalmood ah, isla markaana ay si wadajir ah u soo qabanqaabiyeen Wasaaradda Arrimaha Gudaha iyo Wasaaradda Dhaqaalaha Dhijitaalka ah iyo Hal-abuurka.
Wasiirka Arrimaha Gudaha Jabuuti, Siciid Nuux Xasan, oo ka hadlay munaasabadda daah-furka, ayaa sheegay in hindisahani uu astaan u yahay ka guurista aqoonsiga jir ahaaneed loona gudbayo aqoonsi dhijitaal ah, isla markaana uu yahay tallaabo hore loo qaaday oo lagu xoojinayo kalsoonida aqoonsiga, sugidda macaamillada, hagaajinta ka-mid-noqoshada dhaqaale iyo dhijitaal, iyo dardargelinta dhijitaalaynta adeegyada dadweynaha iyo kuwa gaarka ah.
“Dowladdu kaligeed wax walba ma qaban karto. Isbeddelka dhijitaalka ah waa hannaan firfircoon oo u baahan wada-shaqeyn ballaaran—laga bilaabo hay’adaha dawladda, hal-abuurka qaybta gaarka ah, ilaa taageerada saaxiibbada horumarinta,” ayuu yiri Wasiir Xasan.
