Jabuuti, 16 Luulyo 2026 (Dawan) – Wasiirka Shaqada ee Jabuuti, Yoonis Cali Guuleed, ayaa Talaadadii la kulmay madaxda hoteellada Sheraton iyo Kempinski Palace, si loo xoojiyo iskaashiga u dhexeeya dowladda iyo waaxda gaarka loo leeyahay ee dhinacyada shaqaalaysiinta iyo tababarka dhalinyarada Jabuuti, sida ay sheegtay Wakaaladda Wararka Jabuuti.
Kulamada ayaa diiradda lagu saaray baahiyaha shaqaalaysiinta ee hoteellada, horumarinta xirfadaha shaqaalaha iyo qaababka lagu fududeyn karo in dhalinyarada Jabuuti ay helaan fursado shaqo.
Wasiirka Shaqada ayaa adkeeyay sida ay wasaaraddu uga go’an tahay xoojinta iskaashiga ay la leedahay shirkadaha gaarka loo leeyahay, si aqoonta iyo xirfadaha shaqo ee dhalinyarada loogu waafajiyo baahiyaha suuqa shaqada. Waxa uu xusay in tallaabadaasi ay gacan ka geysan doonto abuurista shaqooyin waara iyo kor u qaadidda tayada xirfadaha gudaha.