Paris (Dawan)— Dowladda Jabuuti ayaa diyaarineysa xeerkeedii ugu horreeyay ee badbaadada bulshada, iyadoo wafdi Jabuuti ah uu magaalada Paris ka wado kulamo lagu dhammaystirayo qabyo-qoraalka sharciga, sida ay Arbacadii sheegtay Wakaaladda Wararka Jabuuti ee ADI. Wafdiga waxaa hoggaaminaya Wasiirka Shaqada, Shaqo-rasmiyeynta iyo Badbaadada Bulshada, Yoonis Cali Geeddi, waxaana diyaarinta xeerka taageeraysa shirkadda sharciga ee Faransiiska laga leeyahay ee Capstan, sida lagu sheegay warbixinta ADI.
Hay’addu waxay sheegtay in kulamadii ugu horreeyay lagu eegay qabyo-qoraal laga diyaariyay wadatashiyo hore oo lala yeeshay dhinacyada ay khuseyso ee Jabuuti. Doodaha ayaa lagu aqoonsaday qodobbo u baahan in la caddeeyo ama la waafajiyo xaaladaha dhaqaale, bulsho iyo hay’adeed ee dalka, sida ay sheegtay ADI.
Wasiir Geeddi ayaa sheegay in xeerku yahay tallaabo muhiim u ah casriyeynta nidaamka badbaadada bulshada iyo xoojinta ilaalinta shaqaalaha iyo dadka caymiska ku jira.
Sida ay ADI ka soo xigatay wasiirka, dowladda ayaa dooneysa sharci cad, isku xiran, la fahmi karo oo awood u leh inuu taageero horumarka mustaqbalka ee nidaamka badbaadada bulshada. Xeerka la diyaarinayo ayaa mideyn doona qodobbada sharci ee hadda kala daadsan, sidoo kalena caddeyn doona xuquuqda iyo waajibaadka shaqaalaha, loo-shaqeeyayaasha iyo hay’adaha ay khuseyso, isla markaana fududeyn doona ballaarinta caymiska bulshada, sida lagu sheegay warbixinta.
