Jabuuti (Dawan)– Jabuuti ayaa Faransiiska kala wareegtay 40% saldhigga ciidamada badda ee Jasiiradda Héron, kaddib xaflad Isniintii lagu qabtay magaalada Jabuuti. Wasiirka Difaaca ee ku-meel-gaarka ah ee Jabuuti, Cumar Cabdi Saciid, ayaa saldhigga kala wareegay Safiirka Faransiiska ee Jabuuti, Jérôme Bresson, kadib munaasabad lagu qabtay Xarunta Taliska Guud ee Ciidamada Qalabka Sida ee Jabuuti, oo ay goobjoog ahaayeen Taliyaha Guud ee Ciidamada, Jeneraal Zakariye Sheekh Ibraahim, iyo saraakiil sare oo ka kala socday ciidamada Jabuuti iyo kuwa Faransiiska ee dalka ku sugan.
Wareejinta ayaa loo fuliyey si waafaqsan Heshiiska Iskaashiga Difaaca ee labada dal. Kahor inta aan la wareejin, ciidamada Faransiiska ee Jabuuti iyo kuwa Jabuuti ayaa si wadajir ah u sameeyey daraasado farsamo oo lagu diyaarinayey dib-u-celinta qaybtaas saldhigga.
Dib-u-celinta qayb ka mid ah saldhigga ayaa ahayd qodob muhiim ah oo ku jiray heshiiska cusub ee difaaca, kaas oo Madaxweynaha Faransiiska, Emmanuel Macron, iyo Madaxweynaha Jabuuti, Ismaaciil Cumar Geelle, ay ku kala saxiixdeen magaalada Paris 24-kii Luulyo 2024.
Sida ku cad dukumentiyada Baarlamaanka Faransiiska, sii joogitaanka ciidamada Faransiiska ee Jabuuti ayaa lagu xiray in dib loo celiyo qayb ka mid ah dhulka ay haystaan, gaar ahaan 40% aagga Jasiiradda Héron. Baarlamaanka Faransiiska ayaa heshiiska ansixiyey bishii Juun 2025.
Heshiiska cusub ayaa sidoo kale kordhiyey kirada sannadlaha ah ee Faransiisku ku bixiyo saldhiggiisa Jabuuti, taas oo laga qaaday 30 milyan oo Yuuro, lagana dhigay 85 milyan oo Yuuro.