JABUUTI, Abriil 4 (Dawan) - Jabuuti ayaa si rasmi ah u daahfurtay xarun weyn oo lagu dayactiro maraakiibta oo ku kacday 107.5 milyan oo yuuro ($116 milyan), iyadoo ujeedadu tahay in la xoojiyo doorkeeda xarun muhiim ah oo dhinaca badda ah, sida ay sheegtay Hay’adda Dekedaha iyo Aagagga Xorta ah ee Jabuuti Sabtidii.
Xarunta oo loo yaqaan Xarunta Dayactirka Maraakiibta ee Jabuuti ayaa waxaa si rasmi ah u furay madaxweyne Ismaaciïl Cumar Geelle Khamiistii, waxaana ay la kaashadeen Kooxda Warshadaha Dhismaha Maraakiibta Damen, iyadoo maalgelinteedana ay bixisay Hay’adda Maalgashiga Caalamiga ah.
Xaruntan ayaa ku taalla meel u dhow marin-biyoodka muhiimka ah ee Bab el-Mandeb, oo ka mid ah marinnada ugu mashquulka badan maraakiibta adduunka, waxaana loogu talagalay inay adeeg siiso maraakiibta kala duwan ee ka gudba gobolka.
Mas’uuliyiintu waxay sheegeen in xaruntu ay leedahay deked sabeynaysa (floating dock) oo dhererkeedu yahay 217 mitir iyo ballac 43 mitir, awoodna u leh inay qaaddo ilaa 20,100 tan, taasoo ka dhigaysa tan ugu weyn nooceeda ee Badda Cas iyo Bariga Afrika sida ay sheegtay Hay’adda.
Jabuuti ayaa sanadihii la soo dhaafay si weyn u maalgelisay kaabayaasha dekedaha iyo saadka, iyadoo dooneysa inay ka faa’iidaysato goobteeda istaraatiijiga ah ee isku xirta Afrika, Bariga Dhexe iyo Aasiya.
