Jabuuti oo gashay wejiga ugu dambeeya ee doorashada

Jabuuti Dawan) – Wasiirka Arrimaha Gudaha Jabuuti, Siciid Nuux Xasan, ayaa Arbacadii kormeeray diyaar-garowga ugu dambeeya ee doorashada madaxtooyada ee la qorsheeyay 10-ka Abriil, sida ay warisay Wakaaladda Wararka Dowladda Jabuuti ee ADI.

Warbixinta ADI ayaa sheegtay in howlaha diyaar-garowga uu galay marxaladdii ugu dambeysay, isla markaana ay u socdaan si waafaqsan jadwalka doorashada.

“Hawlgaladu waxay gaareen marxaladdii ugu dambeysay, waxayna u socdaan si lagu qanco, iyagoo waafaqsan waqtiyadii loo qorsheeyay,” ayaa lagu yiri war ka soo baxay wasaaradda, sida ay werisay ADI.

Wasiirka ayaa la kulmay mas’uuliyiinta maxalliga ah, isagoo ammaanay isku-duwidda hay’adaha kala duwan ee ku lug leh diyaarinta doorashada. Waxa uu sidoo kale bogaadiyay Guddoomiyaha Gobolka Jabuuti, Cabdi Xasan Axmed, isagoo ku dhiirrigeliyay inay sii wadaan dadaalka ilaa maalinta codbixinta.

Sida ay ADI sheegtay, diyaar-garowga ayaa diiradda lagu saaray laba arrimood oo waaweyn: tababarka shaqaalaha goobaha codbixinta iyo diyaarinta agabka doorashada.

Tababaro ayaa la qabtay 31-kii Maarso iyo 1-da Abriil, kuwaas oo lagu barayay habraacyada codbixinta, tirinta codadka iyo isku-geynta natiijooyinka.

Wasiirka ayaa xusay “muhiimadda tababaradan oo lagama maarmaan u ah habsami u socodka doorashada,” sida ay ADI werisay, isagoo carrabka ku adkeeyay doorka madaxda goobaha codbixinta ee hufnaanta iyo kalsoonida.

Dhanka kale, agabka doorashada ayaa la sheegay inuu marayo heer gabagabo ah, iyadoo la diyaarinayo sanaadiiqda codbixinta, liisaska codbixiyeyaasha, waraaqaha codbixinta iyo dukumentiyada rasmiga ah.

Mas’uuliyiintu waxay sheegeen in dhammaan diyaargarowgu uu waafaqsan yahay shuruudaha sharciga, isla markaana loogu talagalay in lagu qabto doorasho xor ah, hufan oo lagu kalsoonaan karo.