Jabuuti oo maalgelin ku taageeraysa haweenka iyo qoysaska reer miyiga

Jabuuti (Dawan) – Ku dhawaad 4,000 oo haween ah oo ku nool deegaannada miyiga ee Jabuuti ayaa ka faa'iideysanaya taageero dhaqaale iyo fursado shaqo-abuur oo lagu bixinayo mashruuca DRESS-EA, kaas oo lagu xoojinayo awoodda bulshooyinka nugul ay ugu adkeysan karaan abaarta iyo saameynta isbeddelka cimilada.

Dowladda Jabuuti ayaa Khamiistii deeqo lacageed iyo dukumentiyo sharciyeed ku wareejisay 26 urur oo maxalli ah, kuwaas oo isugu jira toddobo iskaashato beeraley ah iyo 19 sanduuq maaliyadeed oo bulsho. Taageeradan ayaa sidoo kale si toos ah u gaari doonta in ka badan 1,250 qoys oo ku nool gobollada koonfureed ee dalka.

Barnaamijka ayaa leh miisaaniyad dhan 330,000 oo dollar, iyadoo 298,650 dollar lagu maalgelinayo mashaariic dakhli-abuur ah, halka 31,350 dollar loo qoondeeyay maamulka iyo dabagalka mashruuca.

Munaasabadda lagu wareejinayay taageerada waxaa hoggaaminayay Wasiirka Beeraha, Biyaha, Kalluumeysiga, Xoolaha iyo Kheyraadka Badda ee Jabuuti, Ridwaan Cabdillaahi Bahdoon, iyadoo ay goob joog ka ahayd Wasiirka Haweenka iyo Qoyska, Xana Faarax Assoweh. Labada wasiir ayaa sheegay in mashruucu qayb ka yahay dadaallada lagu xoojinayo madaxbannaanida dhaqaale ee haweenka, kor loogu qaadayo sugnaanta cuntada, isla markaana lagu yareynayo saameynta abaarta.

Mashruucu wuxuu haweenka ka taageerayaa abuurista ganacsiyo yaryar iyo hawlo dhaqaale oo ay ka mid yihiin beeraha, xannaanada xoolaha, farsamada gacanta, maaraynta biyaha iyo adeegyo kale oo bulshada muhiim u ah.

DRESS-EA, oo laga hirgelinayo Jabuuti, Kenya, Suudaan iyo Uganda, waxaa maalgelinaya Sanduuqa La-qabsiga Isbeddelka Cimilada, iyadoo miisaaniyaddiisa guud ee gobolka ay gaareyso 13.08 milyan oo dollar. Mashruuca oo billowday Oktoobar 2020 ayaa diiradda saaraya xoojinta u adkeysiga abaarta, horumarinta nidaamyada digniinta hore iyo hirgelinta tallaabooyinka la-qabsiga isbeddelka cimilada.