Jabuuti, 4 Febraayo 2026 (Dawan)— Dowladda Jabuuti ayaa martigelinaysa Shirweynaha 13-aad ee Caalamiga ah ee Madasha Kormeerayaasha Guud ee Afrika, kaas oo ay isugu yimaadeen mas’uuliyiin dowladeed, hantidhowrro, iyo khubaro si ay uga wada hadlaan arrimaha muhiimka ah ee la xiriira maamulka dadweynaha, hufnaanta, iyo la-dagaallanka musuqmaasuqa.
Munaasabaddan oo soconaysa saddex maalmood (3 ilaa 5 Febraayo), laguna qabanayo Hoteelka Kempinski, ayaa sidoo kale ku beegan kulanka 16-aad ee Guddiga Hoggaaminta Madasha iyo sannad-guuradii 20-aad ee ka soo wareegtay aasaaskii madashan oo Jabuuti lagu asaasay sanadkii 2006.
Madaxweynaha Jamhuuriyadda Jabuuti, Ismaaciil Cumar Geelle, oo goobjoog ka ahaa furitaanka shirka, ayaa carrabka ku adkeeyay doorka ay aaladaha dhijitaalka ah, oo uu ka mid yahay garaadka macmalka ah ay ku leeyihiin horumarinta kormeerka dowladeed, dabagalka maaliyadda, iyo ogaanshaha khaladaadka ama is-daba-marinta.
“Teknoolajiyadan waxay noqon karaan dardargeliyeyaal xooggan oo horseeda maamul-wanaag,” ayuu yiri Madaxweyne Geelle, isagoo ka digay in nidaamyo aan si habboon loo maamulin ay kordhin karaan khataraha sida dambiyada internetka iyo faragelinta xogta. Wuxuu ku baaqay in la dhiso qaab-dhismeed sharci oo adag iyo iskaashi dhow oo dhex mara hay’adaha hantidhowrka, garsoorka, iyo hay’adaha nidaamiya teknoolajiyada dhijitaalka ah.
