Jabuuti Oo Martigelisay Madasha 16-aad Ee Dhaqaalaha Dijitaalka Afrika

Jabuuti – 9 Disembar 2025 (Dawan)- Jamhuuriyadda Jabuuti ayaa martigelisay madasha 16-aad ee dhaqaalaha dijitaalka Afrika, iyadoo sanadkaan diiradda lagu saaray kobcinta dhaqaalaha dijitaalka iyo doorka uu ku leeyahay isku-xirnaanta ganacsi ee qaaradda. Madasha ayaa socon doonta muddo 3 maalmood ah.

Wasiirka Ganacsiga iyo Dalxiiska, Maxamed Warsame Diiriye, ayaa shirguddoominaya madasha, waxaana ka soo qeybgalay mas’uuliyiin ka socday dalal badan oo Afrikaan ah, sida ay xaqiijisay wakaaladda wararka Jabuuti.

Sidoo kale, madashan waxaa ka soo qeybgalay wakiilo ka socday qaybaha gaarka ah ee ganacsiga, kuwaas oo ka kala yimid wadamada ka qeybgalaya madashan.

Madasha, sanadkaan, waxaa hal-ku-dhig looga dhigay; “Ka faa’ideysiga dhaqaalaha dijitaalka iyo hal-abuurka si loo xoojiyo ganacsiga gudaha Afrika iyo horumarinta waarta ee la wadaago.”

Waxay mas'uuliyiinta goob joogga ah iyo ganacsadatu kawada hadlayan caqabadaha ka jira kaabayaasha, tababarka, iyo maalgelinta lagama maarmaanka u ah isbeddelka dijitaalka ee qaaradda.

Madaxweynaha Golaha Ganacsiga Jabuuti, Yuusuf Muuse Dawaale , ayaa madasha ka sheegay in "Dhaqaalaha dijitaalka waa furaha muhiimka ah ee dhismaha Afrika oo soo kacaysa," isagoo ku baaqay in la kordhiyo ganacsiga iyo howlaha kale ee gaar loo leeyahay.

Wasiirka Ganacsiga iyo Dalxiiska, Maxamed Warsame Diiriye, ayaa ka codsaday ka qeybgalayaasha in ay ka mid noqdaan dhisidda iskaashi dhab ah si hal-abuurka dijitaalka loogu beddelo koboc dhaqaale, isagoo intaa ku daray; "Shirkan waa madal gaar ah oo lagu xoojinayo xiriirka dhaqaale ee dalalka Afrika."

Inta ay socoto Madashan, waxaa lagu soo bandhigi doonaa fursadaha ganacsi ee gudaha ee loogu talagalay ka qeybgalayaasha, waxaana la qaban doonaa dood-cilmiyeedyo diiradda saaraya tartanka qaybaha gaarka ah ee Afrika iyo fursadaha cusub ee ka imanaya dhaqaalaha dijitaalka.