Jabuuti (Dawan) – Jabuuti ayaa Talaadadii martigelisay shir dhaqaale oo ay ka qaybgaleen in ka badan 166 shirkadood oo caalami ah, iyadoo Madaxweyne Ismaaciil Cumar Geelle uu maalgashadayaasha ugu baaqay inay ka faa’iidaystaan goobta istiraatiijiga ah ee dalka iyo fursadaha ka jira shan qaybood oo dhaqaalaha ah, sida ay werisay wakaaladda wararka Jabuuti ee ADI.
Shirka, oo ah kii toddobaad ee hawlgallada dhaqaale ee Ururka Caalamiga ah ee Dalalka Faransiiska ku hadla (OIF), ayaa ka furmay Jabuuti. Waxaa sidoo kale ka qaybgalaya ku dhowaad 150 shirkadood oo reer Jabuuti ah.
Geelle ayaa sheegay in Jabuuti ay doonayso inay noqoto xarun dhaqaale oo gobolka ah, isagoo tilmaamay dekedaha, aagagga ganacsiga xorta ah, tareenka isku xira dalka iyo Itoobiya iyo fiilooyinka isgaarsiinta ee badda hoosteeda mara. “Dalkaygu waa buundo isku xirta qaaradaha,” ayuu yiri Geelle
Madaxweynaha ayaa sheegay in Jabuuti iyo OIF ay mudnaanta siiyeen shan qaybood: saadka iyo aagagga ganacsiga xorta ah, teknoolojiyadda dijitaalka ah, tamarta la cusboonaysiin karo, caafimaadka iyo dalxiiska waara. Wuxuu tusaale u soo qaatay Aagga Ganacsiga Xorta ah ee Caalamiga ah ee Jabuuti, mashruuca warshadaha Damerjog, xarunta tamarta dabaysha ee Goubet iyo isbitaalka Al-Shifa.
