Jabuuti (Dawan) — Dowladda Jabuuti ayaa qalab casri ah oo lagu saadaalinayo roobabka mahiigaanka iyo khataraha fatahaadaha ka heshay dowladdaha Shiinaha, taas oo qayb ka ah iskaashiga ay Beijing ku dooneyso inay kusii xoojiso xiriirka ay la leedahay Jabuuti.
Wakaaladda Qaranka ee Saadaasha Hawada Jabuuti ayaa Khamiistii qalabkan ka guddoontay Wakaaladda Saadaasha Hawada ee Shanghai, kaas oo awood u leh inuu saadaaliyo khataraha fatahaadaha ilaa 48 saacadood ka hor, si bulshada iyo hay’adaha dowlladdu ay ugu diyaar garoobaan xaaladaha degdegga ah ee roobabka.
Qalabkan ayaa loo arkaa inuu yahay mid kor u qaadaya tayada iyo wax-qabadka xogta cimilada ee dalka Jabuuti, isla markaana u gogol xaaraya hirgelinta nidaam bixiya digniin hore.
Safiirka Shiinaha ee Jabuuti Hu Bin ayaa bogaadiyay iskaashiga labada dal, isagoo xusay in deeqdan uu sidoo kale la socdo tababar farsamo oo heer sare ah oo la siin doono shaqaalaha wakaaladda si loo xoojiyo aqoonta iyo la-qabsiga nidaamka cusub ee howladeenada si Jabuuti ay u gaarto isku-filnaansho farsamo iyo diyaargarow buuxa oo la-tacaali kara khataraha roobabka iyo fatahaadaha.
