Jabuuti (Dawan)— Dowladda Jabuuti ayaa qaaday tallaabo cusub oo lagu taageerayo dhalinyarada doonaysa inay fursado shaqo ka raadsadaan Canada. Wasiirka Shaqada, Formalization-ka iyo Ilaalinta Bulshada, Yoonis Cali Geedi, ayaa guddoomiyay munaasabad lagu kala saxiixday heshiis iskaashi oo dhex maraya Hay’adda Qaranka Shaqada, Tababarka iyo Isdhexgalka Xirfadeed (ANEFIP) iyo Machadka Faransiiska ee Jabuuti.
Heshiiskan ayaa qayb ka ah mashruuc lagu fududeynayo dhaqdhaqaaqa xirfadeed ee shaqaalaha Jabuuti ee u socda Canada, iyadoo taageero laga helayo Ururka Caalamiga ah ee Socdaalka, IOM.
Sida heshiisku dhigayo, waxaa inta u dhexeysa Oktoobar iyo Diseembar 2026 la qaban doonaa dhowr kulan oo lagu qaadayo imtixaanka qiimeynta luqadda Faransiiska ee TEF Canada, kaas oo muhiim u ah musharraxiinta ka qaybgalaya barnaamijka. Musharraxiinta la xulay ayaa sidoo kale heli doona qiimo-dhimis gaar ah oo ku saabsan imtixaanka, iyadoo suuragal ay tahay in kulamo dheeraad ah la qabto haddii baahidu kororto.
Dowladda Jabuuti ayaa sheegtay in barnaamijkan uu qayb ka yahay dadaallada lagu kobcinayo xirfadaha iyo fursadaha shaqo ee dhalinyarada, gaar ahaan suuqyada shaqada ee caalamiga ah.
