Soo raraya...
Maqaalka waa la soo dejinayaa...
Ciidamada amaanka ayaa sheegay in tallaabadan ay qeyb ka tahay dadaallada looga hortegayo socdaalka sharci darrada ah.
Jabuuti (Dawan)— Booliska Qaranka Jabuuti ayaa Arbacadii sheegay in 649 qof oo ajaanib ah dib loo celiyay, kaddib howlgal ay si wadajir ah ula fuliyeen ciidamada qalabka sida oo lagu bartilmaameedsaday socdaalka sharci darrada ah. Booliska ayaa sheegay in howlgallada noocan ahi sii socon doonaan.
Bayaanka boolisku ma sheegin dalalka ay dadkaasi u dhasheen, halka loo celiyay, ama goorta iyo goobta howlgalka laga fuliyay. Sidoo kale ma faahfaahin baaritaannadii la sameeyay ka hor celintooda.
Maqaallo la xidhiidha
Jabuuti ayaa ku taallaa marin ay dadka ka soo socda Geeska Afrika u sii maraan Yemen iyo Jasiiradda Carabta. Hay’adda Caalamiga ah ee Socdaalka (IOM) ayaa sheegtay in qiyaastii 80% dadkii ay diiwaangelisay ee Yemen galay bishii Juun ay ka soo ambabaxeen Jabuuti. Xogtaasi ma caddaynayso in dadka howlgalkaan lagu celiyay ay Yemen ku wajahnaayeen.
Howlgal kale oo dhacay bishii Agoosto, booliska ayaa magaalada Jabuuti ku qabtay in ka badan 200 oo qof, kuwaas oo loo qaaday xarunta Nagad si loo hubiyo aqoonsigooda, sida ay werisay Wakaaladda Wararka Jabuuti ee ADI.
