Jabuuti oo xaqiijisay in dekedaheedu diyaar u yihiin qaabilaada maraakiibta xilli ay sii kordhayan xiisadaha Badda Cas

Jabuuti (Dawan) – Guddoomiyaha Hay'adda Dekedaha iyo Aagagga Ganacsiga Xorta ah ee Jabuuti, Abuubakar Cumar Haadi, ayaa sheegay in dekedaha dalkiisu ay awood u leeyihiin inay qaabilaan maraakiibta dheeraadka ah, inkasta oo ay jiraan carqaladaha ka jira isu socodka maraakiibta ee Badda Cas.

Haadi ayaa sheegay in kororka kharashaadka maraakiibta ee la xiriira xiisadda marin-biyoodka Bab al-Mandab uu yahay caqabad weyn oo saameyn ku leh dhaqaalaha dalalka gobolka.

Waxa uu xusay in qiimaha lagu raro hal konteenar uu ka kacay ku dhowaad 3,000 oo doolar ilaa 10,000 oo doolar, taas oo uu ku tilmaamay culays weyn oo ku yimid ganacsiga.

Isagoo wareysi siiyay Telefishinka iyo Raadiyaha Qaranka Jabuuti (RTD), ayuu yiri: "Ma awoodno inaan annaga keliya qaadno kharashaadkan, waxaana ka shaqeyneynaa sidii loo heli lahaa xalal looga fogaanayo in howlaha dekeduhu ku socdaan khasaare."

Waxa uu carrabka ku adkeeyay in kaabeyaasha dekedaha Jabuuti ay si buuxda u shaqeynayaan, isla markaana ay diyaar u yihiin inay qaabilaan dhaqdhaqaaq ganacsi oo dheeraad ah inkasta oo ay jiraan caqabadaha gobolka.

"Dekedaha Jabuuti mar walba way diyaar ahaayeen, waxaanan leenahay dhammaan kaabeyaasha lagama maarmaanka ah," ayuu yiri, isagoo intaas ku daray in dalka uu hadda leeyahay lix dekadood, kuwaas oo shan ka mid ahi yihiin dekedo biyo qoto dheer leh, loona dhisay si loo kordhiyo awoodda qaabilaadda.

"Waxaan diyaar u nahay inaan adeegno dhaqdhaqaaq kasta oo ganacsi oo u baahan adeegyadeenna," ayuu raaciyay.

Jabuuti waxay ku taallaa marin-biyoodka Bab al-Mandab, oo ka mid ah marinada badda ee ugu mashquulka badan caalamka, kuna xiriiriya Badda Cas, Gacanka Cadmeed iyo Badweynta Hindiya. Marin-biyoodkan ayaa muddooyinkii dambe la kulmay qalalaase amni oo saameeyay isu socodka maraakiibta isla markaana sare u qaaday kharashaadka gaadiidka badda.

Haadi ayaa sidoo kale sheegay in Jabuuti ay leedahay awood ku filan oo ay ugu adeegto dalalka gobolka, isagoo caddeeyay inuusan hadda jirin qorshe lagu dhisayo dekedo ama aagag ganacsi oo xor ah oo cusub. "Ma qorsheynayno inaan si xad dhaaf ah u maalgelinno dhismaha dekedo ama aagag ganacsi oo cusub. Mudnaanteennu waa inaan si buuxda uga faa'iideysanno kaabeyaasha aan hore u dhisnay," ayuu yiri. Waxa uu ugu dambeyn xusay in koboca howlaha dekedaha mustaqbalka uu si weyn ugu xirnaan doono xaaladaha dhaqaale ee caalamka iyo gobolka, halkii uu ka iman lahaa ballaarinta kaabeyaasha cusub.

Jabuuti oo xaqiijisay in dekedaheedu diyaar u yihiin qaabilaada maraakiibta xilli ay sii kordhayan xiisadaha Badda Cas

Yaa ku guuleystay kuraasta ugu badan ee golayaasha deegaanka Galmudug?

Xabsi mise bilow cusub? 60 maxbuus oo la baray xirfado shaqo

Wasaaradda Amniga Gudaha oo dardargelinaysa isku-duwidda hay’adaha amniga ka hor shirka amniga ee Sebtembar

Xisbiga Towfiiq oo ku hanjabay dibadbaxyo, baaqna u diray guddiiga doorashooyinka

Maqaallo La Xidhiidha

Soomaaliya oo dardargelinaysa fududeynta ganacsiga iyo is-dhexgalka suuqa gobolka

Qodobada ugu muhiimsan ee Wararka Dawan

Jabuuti iyo Talyaaniga oo xoojinaya iskaashiga tacliinta iyo amniga

Qoraallo Cusub

Yaa ku guuleystay kuraasta ugu badan ee golayaasha deegaanka Galmudug?

Jabuuti oo xaqiijisay in dekedaheedu diyaar u yihiin qaabilaada maraakiibta xilli ay sii kordhayan xiisadaha Badda Cas

Xabsi mise bilow cusub? 60 maxbuus oo la baray xirfado shaqo

Qaybaha