Nairobi (Dawan)– Culimada iyo bulshada Soomaalida ee ka soo jeeda gobolka Gaarisa ee dalka Kenya ayaa si adag uga horyimid qorshe lagu doonayo in dugsiyada Quraanka lagu daro nidaamka waxbarashada carruurnimada ee rasmiga ah, iyagoo ka digay in tallaabadaasi ay dhaawici karto nidaamka waxbarashada diinta ee soo jireenka ah.
Culimada ayaa muujiyay walaac xooggan oo ku saabsan waxa ay ku tilmaameen “isku day lagu faragelinayo waxbarashada diinta,” iyagoo sheegay in dugsigu uu yahay hannaan taariikhi ah oo muhiim u ah barbaarinta carruurta Muslimiinta ah, gaar ahaan bulshada Soomaalida ee ku nool waqooyi bari Kenya.
Sheekh Xasan Cabdi, oo ku hadlayay magaca Golaha Sare ee Muslimiinta Kenya, ayaa sheegay in dastuurka dalka uu si cad u dammaanad qaadayo xorriyadda diinta, isagoo carrabka ku adkeeyay in aan la aqbali doonin in faragelin lagu sameeyo waxbarashada Quraanka.
“Quraanku waxa uu laf-dhabar u yahay nolosha bulshada Muslimiinta. Sidaas darteed, wax kasta oo lagu doonayo in lagu beddelo ama lagu dhex daro nidaam kale waa mid aan la aqbali karin,” ayuu yiri Sheekh Xasan Cabdi.
Qorshahan ayaa ka dhashay hindise ay soo bandhigtay hay’ad la shaqeysa dowladda hoose ee Gaarisa, iyadoo taageero ka heleysa Ururka Caalamiga ah ee Lutheran World Federation, oo ku baaqay in la isku daro waxbarashada carruurta iyo dugsiyada Quraanka, si dib u habeyn loogu sameeyo nidaamka waxbarasho ee carruurta.
Culimada diidan qorshahan ayaa sidoo kale ku dooday in dowladda hoose ay mudnaanta siiso adeegyada aas-aasiga ah sida biyaha iyo caafimaadka, halkii ay ku mashquuli lahayd arrimo ay ku tilmaameen kuwo “xasaasi ah oo diini ah.”
