Nairobi (Dawan)- Dowladda Kenya ayaa ku dhawaaqday inay cafis u fidisay muwaadiniinteeda si sharci darro ah uga qeyb qaatay dagaalka Ruushka iyo Ukraine, kadib heshiis ay la gaartay Moscow oo dhigaya in la joojiyo askareynta Kenyanka ee ku biiraya ciidanka Ruushka.
Go’aankan ayaa yimid kaddib booqasho uu Ra’iisul Wasaaraha ahna Wasiirka Arrimaha Dibadda Kenya, Musalia Mudavadi, uu ku tegay Moscow intii u dhaxeysay 15 illaa 18 Maarso, halkaas oo uu kula kulmay Wasiirka Arrimaha Dibadda Ruushka Sergey Lavrov. Wadahadallada ayaa diiradda lagu saaray tirada sii kordheysa ee muwaadiniinta Kenya kuwaas oo la askareeyay si ay uga barbar dagaalamaan ciidanka Ruushka, iyada oo loo marayo wadooyin aan sharci ahayn.
Sida uu dhigayo sharciga Kenya, muwaadiniinta dalkaas looma oggola inay ku biiraan ciidamo shisheeye haddii aysan haysan dhalashada dalkaas. Qodobka 68-aad ee xeerka ciqaabta ayaa dhigaya in qofka si sharci darro ah ugu biira ciidan shisheeye uu mutaysan karo xabsi gaaraya 10 sano, haddii aanay maxkamaddu go’aamin in askareyntu aysan ku imaan rabitaan qofeed.
Mudavadi ayaa sheegay in Ruushku oggolaaday in Kenya lagu daro “liiska la mamnuucay in la askareeyo muwaadiniinteeda" taas oo ka dhigan in la joojiyo qorista muwaadiniinta Kenya ee ku biiraya ciidanka Ruushka. Heshiiska ayaa sidoo kale oggolaanaya in Kenyanka doonaya inay ka baxaan dagaalka inay si nabad ah ugu laabtaan dalkooda.
Sidoo kale, heshiiska ayaa siinaya safaaradda Kenya ee Moscow fursad ay ku hesho adeegyo qunsuliyadeed oo ay kula xiriiri karto muwaadiniinta dhaawacmay, si loo fududeeyo dib u celintooda ama soo celinta meydadka kuwa ku dhintay dagaalka.