Muqdisho (Dawan)— Ra’iisul Wasaarihii hore ee Soomaaliya Xasan Cali Khayre ayaa Dowladda Federaalka ku eedeeyay inay wax ka qaban weyday barakaca iyo tahriibka, isaga oo sheegay in Soomaali badan ay dalka uga baxayaan duruufo nololeed iyo rajo la’aan.
Khayre ayaa eedeymahan ku soo bandhigay muuqaal Arbacadii lagu baahiyay barahiisa bulshada, isaga oo sheegay inuu soo xiganayo xog ay daabaceen hay’adaha Qaramada Midoobay.
Isaga oo sheegay inuu tixraacayo warbixin ay soo saartay Hay’adda Socdaalka Adduunka ee IOM, Khayre ayaa sheegay in 257,135 dhaqdhaqaaq laga diiwaangeliyay toddobo goobood oo lagala socdo xuduudaha Soomaaliya intii u dhexeysay Febraayo iyo Diseembar 2025.
Sida uu sheegay, 74% dhaqdhaqaaqyadaas waxay ahaayeen kuwo dalka looga baxay, halka 26% ay ahaayeen kuwo gudaha Soomaaliya lagu soo galay. Xogtu waxay tirineysaa dhaqdhaqaaqyada laga diiwaangeliyay goobahaas, mana aha tirada guud ee dadka dalka ka baxay.
Khayre ayaa sidoo kale sheegay in 680,000 oo qof ay barakaceen sannadkii 2025, halka ku dhowaad 217,000 oo kale ay barakaceen bilihii Abriil, May iyo Juun ee 2026.
