Jabuuti (Dawan) – Dhakhaatiirta Jabuuti ayaa bulshada uga digay saameynta caafimaad ee ka dhalan karta kuleylka daran, gaar ahaan dadka qaba cudurrada wadnaha iyo xaaladaha kale ee caafimaad, sida ay sheegtay Wakaaladda Wararka Jabuuti.
Dr. Mouhyadine Ahmed Omar, oo ku takhasusay cudurrada wadnaha, ayaa sheegay in heerkulka sare uu kordhin karo culayska ku yimaada jirka, taas oo sababi karta fuuqbax, daal badan iyo dhibaatooyin caafimaad oo halis ah, gaar ahaan dadka qaba dhiig-karka ama kuwa qaata daawooyinka la xiriira cudurrada wadnaha.
Waxa uu kula taliyay bukaannada qaba cudurrada wadnaha inay xilligan qaataan taxaddarro dheeraad ah, ayna cabbaan biyo ku filan, ayna sii wataan daawooyinka ay dhakhaatiirtu u qoreen, isla markaana ka fogaadaan jimicsiga culus inta lagu jiro saacadaha uu kuleylku ugu sarreeyo.
