Koonfur Galbeed oo daah-furtay garoon Ciyaareed oo laga hirgeliyay Baay

Baydhabo (Dawan) – Hogaamiyaha ku meel gaarka ah ee Dowladda Koonfur Galbeed Soomaaliya, Jibriil Cabdirashiid Xaaji, ayaa maanta daah-furay garoon ciyaareed cusub oo uu maalgeliyay Midowga Yurub, kaas oo laga hirgeliyay degaan ka tirsan maamulka Koonfur Galbeed.

Dhismaha Garoonka waxaa fuliyay hay’adda NIS Foundation, iyadoo mashruuca lagu taageeray maalgelin ka timid Midowga Yurub, sida uu sheegay Jibriil Cabdirashiid Xaaji intii lagu guda jiray munaasabadda daah-furka.

Mas’uulka ayaa uga mahadceliyay Midowga Yurub, hay’adda NIS Foundation iyo Wasaaradda Arrimaha Gudaha kaalintii ay ka qaateen hirgelinta mashruuca, isagoo sheegay in garoonku uu faa’iido u yeelan doono bulshada deegaanka.

“Garoonka ciyaaruhu wuxuu ka qeyb qaadan doonaa isdhexgalka bulshada, saaxiibtinimada dhalinyarada iyo xoojinta wada noolaanshaha bulshada,” ayuu yiri Jibriil.

Wuxuu sheegay in garoonka si rasmi ah loogu wareejiyay maamulka degmada si loo maareeyo amnigiisa, dayactirkiisa iyo sidii bulshada loogu fududeyn lahaa ka faa’iideysiga adeegyada uu bixinayo.

Jibriil ayaa sidoo kale ugu baaqay hay’adaha horumarinta inay taageeraan mashaariic la mid ah kan, gaar ahaan goobaha ay haweenka iyo dhalinyaradu u baahan yihiin adeegyada bulshada iyo ciyaaraha.

Mas’uulka ayaa ugu dambeyn ku boorriyay bulshada deegaanka inay si wanaagsan uga faa’iideystaan garoonka cusub, isla markaana ay door ka qaataan ilaalintiisa, nabadeynta iyo amniga deegaanka.

Garoomada ciyaaraha iyo goobaha bulshada ayaa kamid ah kaabeyaasha loo arko inay gacan ka geystaan horumarinta dhalinyarada iyo xoojinta wada noolaanshaha bulshada ee deegaannada Soomaaliya.