Koonfur Galbeed oo qabaneysa doorasho ka duwan Federaalka

Soomaaliya (Dawan) – Dowlad Goboleedka Koonfur Galbeed Soomaaliya ayaa magacawday Guddiga Madaxa-bannaan ee Xuduudaha iyo Doorashooyinka maamulka, sida lagu sheegay wareegto madaxweyne oo soo baxday 23-ka Maarso, xilli ay sii xoogeysanayaan xiisadaha kala dhexeeya dowladda federaalka.

Wareegtada oo uu saxiixay Madaxweynaha Koonfur Galbeed, Cabdicasiis Xasan Maxamed (Laftagareen), ayaa lagu dhisay guddi ka kooban sagaal xubnood oo mas’uul ka noqon doona dejinta xuduudaha degmooyinka iyo maamulka doorashooyinka gudaha dowlad goboleedka.

Guddiga waxaa guddoomiye u ah Shuceyb Nuur Xuseen, halka Cabdulahi Xuseen Cusmaan uu yahay guddoomiye ku-xigeen. Xubnaha kale ayaa kala ah Feysal Maxamed Isaaq, Ibraahim Isaaq Xasan, Maaxi Cusmaan Cali, Cabdiraxmaan Cabdulqaadir Maxamed, Fardows Maxamed Ismaaciil, Cusmaan Jeelaani Awoow iyo Cabdiraxmaan Maxamed Ibraahim.

Wareegtada ayaa sheegtay in dhismaha guddigan uu ku saleysan yahay Dastuurka Kumeel-gaarka ah ee Federaalka iyo dastuurka Dowlad Goboleedka Koonfur Galbeed.

Guddigan ayaa loo xil saaray dejinta xuduudaha degmooyinka iyo hirgelinta doorashooyinka heer deegaan si waafaqsan sharciga, iyadoo magacaabista ay si degdeg ah u dhaqan gashay.

Tallaabadan ayaa timid kadib markii Wasaaradda Arrimaha Gudaha ee Xukuumadda Federaalka Soomaaliya ay shalay amartay in maamullada heer gobol iyo degmo ee Koonfur Galbeed ay sii wataan xilalkooda, inkastoo ay dhammaatay muddadii sharciyeysnayd ee qaar ka mid ah hoggaanka maamulka.

Sidoo kale, waxay ku soo beegmaysaa xilli dowladda federaalka ay ku dhawaaqday in dalka uu galay marxalad doorasho heer qaran ah, iyadoo ballanqaadday doorasho xor, xalaal ah oo daahfuran oo ku saleysan nidaamka qof iyo cod.

Imaanshaha tallaabooyinkan kala duwan ayaa muujinaya xiisadda sii kordheysa ee u dhexeysa Muqdisho iyo Baydhabo, gaar ahaan arrimaha maamulka, awoodda doorashooyinka iyo nidaamka federaalka.