London 12 Maarso 2026 (Dawan)– Lugtii koowaad ee wareegga 16-ka ee tartanka UEFA Champions League ayaa lasoo bandhigay kulamo xiiso badan dhaliyay iyo natiijooyin lama filaan ah, iyadoo qaar ka mid ah kooxaha waaweyn ee Yurub ay mugdi gashay rajadoodi koobkan
Siddeedda kulan ee la ciyaaray waxay muujiyeen in awooddii ay kooxaha Ingiriisku kusoo bandhigeen wareegga guruubyada ay si degdeg ah u burburtay, maadaama aanay jirin hal koox oo ka tirsan Premier League oo ku dhammaysatay lugta hore iyada oo guul haysata.
Garoonka Santiago Bernabéu Stadium, kooxda Real Madrid ayaa si lama filaan ah u garaacday Manchester City, kaddib markii ciyaariyahanka khadka dhexe Federico Valverde uu dhaliyay saddex gool (hat-trick) qaybtii hore ee ciyaarta. Inkasta oo Madrid ay ka maqnaayeen dhaawacyo soo gaaray Kylian Mbappé iyo Jude Bellingham, haddana kooxda heysata 15-ka koob ee Yurub ayaa si buuxda u maamushay kulanka.
Dhanka kale, Arsenal ayaa barbaro 1–1 ah la gashay Bayer 04 Leverkusen , kaddib rigoore muran dhalisay oo daqiiqadihii dambe la siiyay. Ciyaaryahanka Kai Havertz ayaa rigoorada u beddelay gool isagoo ka hor yimid kooxdiisii hore, taas oo ka dhigtay in natiijada labadan koox ay noqoto mid la go'aamin doono lugta labaad ee lagu ciyaari doono Emirates.
Kooxda Tottenham Hotspur FC ayaa habeen adag la kulantay markii ay si xun ku bilaabatay kulanka ay la ciyaareysay Atlético Madrid. Goolhayaha cusub Antonín Kinský ayaa si khaladaad ah ugu hibeyay laba gool kooxda reer Spain ka hor inta aan laga saarin ciyaarta daqiiqaddii 17-aad, iyadoo Spurs lagu lahaa markaas 3 gool. Inkasta oo ay dib isu abaabuleen, haddana guuldarro 5–2 ah ayaa uga tagtay hawl adag lugta labaad ee London.
Kooxda difaacanaysa koobka, Paris Saint‑Germain, ayaa iyaduna tallaabo weyn u qaaday wareegga siddeedda kaddib markii ay 5–2 ku garaacday Chelsea magaalada Paris. Khalad uu sameeyay goolhayaha Chelsea Filip Jørgensen ayaa beddelay jihada kulanka, halka beddelka Khvicha Kvaratskhelia uu sababay inuu laba gool dhaliyo daqiiqadihii dambe.
