Kooxo hubeysan oo dhakhtar afduubtay si loo sii daayo eedeysane ku xiran Puntland

Gaalkacyo (Dawan) – Dowlad-goboleedka Puntland ayaa sheegtay in nin lagu eedeeyay inuu ku lug lahaa dilkii taliyihii ciidanka madaxtooyada sanadkii 2020 laga soo wareejiyay dhanka Dowlad Deegaanka Soomaalida, halka afduub loo geystay dhakhtar caafimaad oo ka dhacay Gaalkacyo uu sare u qaaday walaaca laga qabo aargoosi qabiil.

Sida ay sheegeen maamulka Puntland, Cabdirisaaq Jaqallood ayaa ka mid ahaa koox lagu eedeeyay ka ganacsiga khamriga, kuwaas oo iska horimaad la galay ciidamada amniga 9-kii Agoosto 2020, taasoo keentay geerida Cismaan Cumar Maxamed oo xilligaas ahaa taliyihii ciidanka madaxtooyada Puntland.

Kadib dhacdadaas, eedeysanaha ayaa u baxsaday dhanka Dowlad Deegaanka Soomaalida, halkaas oo uu ku sugnaa illaa 31-kii Maarso 2026, markaas oo lagu soo wareejiyay Puntland kadib daba-gal dheer oo ay sameeyeen laamaha ammaanka.

Maalmo kadib, 21-kii bishan, koox hubeysan ayaa Gaalkacyo ka afduubtay Faarax Cabdi Maxamed, oo ka tirsanaa bahda caafimaadka, isla markaana ka shaqeynayay Isbitaalka Guud ee gobolka Mudug, kana howlgalayay hay’adda Dhakhaatiirta aan xuduudka lahayn ee (MSF).

Ilo deegaanka ah ayaa sheegay in maleeshiyaadka afduubka geystay ay dalbanayaan in la sii daayo eedeysanaha xiran, iyadoo dhacdadan loo arko mid la xiriirta xiisado qabiil oo ka dhashay dilkii hore.

Dhacdadan ayaa mar kale muujineysa caqabadaha amni iyo caddaaladeed ee ka jira Puntland, halkaas oo mararka qaar arrimaha qabiilku ay saameyn ku yeeshaan habka loo maareeyo khilaafaadka iyo fulinta sharciga.