Kooxo hubeysan oo weerar ku qaaday markab ku sugnaa xeebaha Soomaaliya

Puntland 2-da Janaayo 2026 ( Dawan)-

Xarunta Amniga Badweynta Hindiya (MSCIO) ayaa xaqiijisay in kooxo hubeysan ay weerar ku qaadeen markab kalluumeysi oo marayay xeebaha Puntland ee waqooyi-bari Soomaaliya.

Weerarka ayaa lala beegsaday markab lagu magacaabo Liao Dong Yu 578, kaas oo ku sugnaa meel u dhow xeebta Kulule, degmada Bandar-bayla ee ka tirsan Karkaar, sida lagu sheegay war-saxaafadeed ay soo saartay xarunta MSCIO.

MSCIO waxay sheegtay in dhacdadu ay dhacday 1-dii Janaayo 2026, iyadoo xustay in baaritaanno lagu hayo faahfaahinta weerarka iyo khasaaraha ka dhashay. Ilaa hadda si rasmi ah looma xaqiijin in kooxaha hubeysan ay la wareegeen gacan ku haynta markabka ama shaqaalihii saarnaa.

Markabka Liao Dong Yu 578 ayaa horey ula kulmay weerar burcad-badeed, kaddib markii bishii Nofeembar 2024 lagu qabsaday isla xeebaha Puntland.

Markabka ayaa la sii daayay bishii Janaayo 2025, kaddib markii la bixiyay lacag madax-furasho ah oo lagu qiyaasay ku dhowaad laba milyan oo doolar, sida ay sheegeen ilo amni.

Dhacdadan ayaa noqonaysa markii labaad ee markabkan lagu qaado weerar noocan oo kale ah, taasoo dib u soo nooleyneysa walaaca laga qabo amniga badaha iyo suurtagalnimada soo laabashada falalka burcad-badeedda ee xeebaha Soomaaliya.

Xarunta Amniga Badweynta Hindiya ayaa digniin u dirtay dhammaan maraakiibta ka howlgasha aaggaas, iyadoo ugu baaqday inay muujiyaan feejignaan dheeri ah, isla markaana si degdeg ah uga warbixiyaan dhaqdhaqaaq kasta oo laga shakiyo oo ka socda xeebaha Puntland.